Contignü prinzipal
N laûr cun le publich adatè
Da canche al é gnü metü sö la defenüda zivica s’à Südtirol dassënn mudé. La istituziun s’à intratan etablè, la defenüda zivica é oramai n conzet. Na inrescida dl ASTAT dl 2007 à mostrè che trëi sön cater sudtirolesc conësc la defenüda zivica, plü co mec sa inće ćiügn che é sü dovëis. Porimpò röiel tres ćiamò tröc zitadins adalerch cun idees falades sön la defensuria popolara. Ai vëiga te ëra na avocata debann por de vigni sort de litighes. Por ti sciampè a de te’ malintenüdes y por splighé le laûr dla defenüda zivica vëgnel stampè dal 2000 incà na brosciüra. Volgger à laurè fora süa brosciüra „Ihr gutes Recht“ (Osc bun dërt) por le vintecinejim iubilê dla istituziun, ara l’à abelida cun n valgönes caricatöres dl artist sudtirolesc Hanspeter Demetz y ti l’à menada a 55.000 families de Südtirol. „La defenüda zivica po ma se rënde cunt te na manira efiziënta de süa ativité istituzionala, sce ara é conesciüda y sce i zitadins y les zitadines sa ćiügn che é i dovëis y les competënzes dla defensuria popolara“, scrî Volgger te süa relaziun anuala contlusiva dl 2008.
Dlungia la brosciüra te trëi lingac él inće gnü metü adöm na plata internet nöia y saurida da d’adorè sön la defenüda zivica. Le portal nü pîta por le pröm iade inće la poscibilité de portè dant retlamaziuns online. Da canche la istituziun é gnüda metüda sö s’à la manira de tó sö contat dassënn mudé. Deperpo che i zitadins portâ dant sües chestiuns tla pröma fasa tan co dagnora personalmënter, nen êl cun le tëmp tres deplü che telefonâ. Dl 2005 à por le pröm iade de plü porsones telefonè impede baié personalmënter cun la defenüda zivica. Dal 2006 incà vara inće da ti menè ala istituziun retlamaziuns y interpelaziuns por e-mail. La poscibilité de na retlamaziun online vëgn tuta ion y tröp en conscidraziun. Dl 2007 à la defenüda zivica registré pro les retlamaziuns portades dant por scrit por le pröm iade de plü retlamaziuns online co lëtres. Inće porchël é l’aiüt dl defensur popolar tan dlungia co mai. I zitadins po portè dant sües chestiuns te n dialogh personal, por telefonn, posta, fax, e-mail o inće online. Dlungia les udiënzes da vigni dé a Balsan tëgn la defensuria popolara regolarmënter udiënzes a Porsenù, Bornech, Maran, Neumarkt, Solaneres, Sterzing, Urtijëi y San Martin de Tor.
Inće ti media da vigni dé s’à la defensuria popolara dè da fà ativamënter. Dal 2006 incà vëgnel fora dui iadi al mëis tl foliet da vigni dé „Dolomiten” la rubrica „Ein Fall für die Volksanwaltschaft“ (N caje por la defenüda zivica). Sön la basa de caji concreć spliga Volgger le laûr de süa istituziun. Dal 2008 incà ti vëgnel pité chësc sorvisc inće ai leturs talians. Tl foliet da vigni dé „Alto Adige“ vëgnel fora la rubrica „Il difensore civico risponde“ (incö àra le titul „La Difesa civica per te“). Cun dötes chëstes mosöres éra jüda da fà conësce ćiamò deplü la defenüda zivica. Chësc à albü conseguënzes diretes sön le laûr dla istituziun. Dl 2008 él stè por le pröm iade passa 3.000 porsones che à damanè do pro la defenüda zivica y al é gnü daurì por le pröm iade passa 1.000 caji.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
