Contignü prinzipal

Plü dlungia i zitadins

Tratan döt le tëmp de süa inćiaria â le defensur popolar Palla metü le zitadin tl zënter de sü sforc. Porchël â la defenüda zivica fat n gran vare inant da podëi tignì dl 2000 por le pröm iade inće udiënzes ti ospedai da Porsenù y da Bornech. Indô porvâ le presidënt dl Consëi Provinzial Thaler da intervegnì. Te na lëtra al defensur popolar inviâl Palla da „ponsè sura sön la utilité de chësta dezijiun“. Sön chëra tolô jö Palla indô les udiënzes. Chësc descedâ na tempesta de indignaziun ti media y do trëi edemes podô Palla indô jì inant cun les udiënzes ti ospedai. Inće ti ospedai da Balsan y da Maran dêl gnì pité de de te’ udiënzes. Chilò ne n’ê la defenüda zivica indere dal mëteman incà nia bona de se gnì cun la direziun di ospedai. Le ćiamp dla sanité, dantadöt les retlamaziuns canche an minâ che al foss gnü fat fai de tratamënt, alda daimpröma incà pro les lamentanzes di zitadins che gnô dant le plü sovënz. Palla pretenô porchël che al gniss metü sö na portina arbitrala tl caje de chestiuns de responsabilité profescionala dl dotur, l’aconsiadù provinzial competënt Otto Saurer (SVP) refodâ indere na te’ istituziun.

Por le pröm iade êl gnü dè fora dl 2000 inće na brosciüra d’informaziun te trëi lingac sön i dovëis dl defensur popolar. Dlungia la gran ativité da reladù à inće chësta brosciüra contribuì ala gran popolarité dla defenüda zivica. Palla sburlâ inće do che la defenüda zivica - chël ô dì la figöra dl ombudsman - gniss tuta sö ti programs de stüde te Südtirol. Te döes o cater ores de insegnamënt de dërt y educaziun zivica dêl gnì splighé i dovëis dl defensur popolar. Mo süa ghiranza ne gnô nia ascutada.

Tres la reforma costituzionala dl 2001 é le control dles deliberaziuns de comun tres l’aministraziun provinziala tan co tomè demez. I comuns messâ denant lascè controlè dala repartiziun provinziala „Ënć locai“ (tl lingaz baié control di comuns) düć, dal 1998 incà ma plü i decreć plü importanć. Sciöche al é tomé demez chësc mecanism de control él por forza gnü tut en conscidraziun deplü i sorvisc dl defensur popolar. Bele ma dl 2003 é le numer di caji che â da nen fà cun chestiuns de comun chersciüdes tan co dl 37 porcënt. Sce al gnô cumpedè dl 2002 ma 272 caji, nen n’êl n ann dedô bele 739.

Ai 4 d’aurì dl 2004 à Werner Palla laurè l’ultim dé. Tratan le tëmp de süa inćiaria che â doré feter dodesc agn él stè incër 25.000 porsones che à damanè consëi dal defensur popolar, al ê gnü daurì avisa 8.674 ać. Passa le 71 porcënt de chisc caji podô gnì destrigà a bëgn dl retlamadù, chël ô dì dl zitadin.

Pro les plüres di zitadins dominâl inće tl tëmp dla inćiaria de Palla i problems lià ala urbanistica y al frabiché. Nü laprò ê l’argomënt dl dovëi de vazinaziun, cun chël che la defenüda zivica se dê jö dal 1994 (ann che al ê gnü portè ite le dovëi) incà. La regolamentaziun che i pici mituns che ne podô nia mostrè sö la vazinaziun cuntra l’epatita B ne gnô nia ametüs tla scora d’oblianza o al ejam de maturité, ne gnô gnanca capida dal defensur popolar. Ala fin jôl ćinamai debojëgn dla intervenziun dl presidënt de stat. Tres decret (26 de jenà dl 1999, nr. 355) gnôl deliberè che i scolars che ne podô nia mostrè sö la zertificaziun dles vazinaziuns ne gnô nia stlüć fora dala scora o dai ejams. Dassënn aumentades ê ti ultims agn inće les plüres porvia di desturbs dla vera, bele ma danter le 2001 y le 2003 êl rové ite 30 plüres coletives de convijins atocà - por le plü zënza suzès. Les propostes y i impulsc de Palla por les mudaziuns dla lege gnô tutes sö dai politics responsabli cun püćia ressonanza. Te süa relaziun finala 2001-2003 ê Palla contënt da odëi sciöche sü sforc pro l’emendamënt dla lege provinziala sön la defenüda zivica gno incoronà de suzès.

30 agn defenüda zivica te Südtirol
  Titul Download

L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata.
Desciariede sën
Free PDF
PDF Reader
Adobe© Reader©
Adobe© Reader©

Relazione la Difesa civica in Italia 2014/15 [Publicazions]
Relazione la Difesa civica in Italia 2014/15
  1. PDF (1026 KB)