Contignü prinzipal
Ći ch’i desses zënza ćiamò savëi
Por dötes les zitadines y düć i zitadins
Vignun po s'adressè a nos tan inant ch'al é de nosta competënza. La nazionalité o la residënza n'à nia da dì. I ne sun nia ma porsones de referimënt por porsones singules o families, mo inće por grups de zitadins, porsones iuridiches, istituziuns soziales, dites, rapresentanć d'ofizi y ënć teritoriai.
Scemplité
La prozedöra ne ghira nia formalitês massa complicades. Podëis portè dant ostes domandes a boćia, por scrit, por fax o por e-mail. I gnarëis sambëgn avisà sura i resultać dla ejaminaziun.
Resservatëza
Ostes domandes, lamentanzes y üsc dübi vëgn ejaminà cun resservatëza, sc'i n'orëis nia instësc tó sö contat cun l'autorité competënta. La defensuria popolara y sües colauradësses mëss se tignì al socrët d'ofize.
Ogetivité, degöna rapresentanza de partis
Inće sce i dübi y les lamentanzes di zitadins stà al pröm post, mëss le defensur popolar provinzial restè ogetif. I ne podun no rapresentè partis ti ofizi, no ti mët jö a chisc relaziuns por scrit.
Dërt de tó vijiun completa tles pratiches
La defensuria popolara à le dërt de tó vijiun completa tles pratiches y de ćiafè informaziuns nezesciares da pert di ofizi.
Ara à inće la poscibilité da dè l'inćiaria por n arat.
Mesi legai da sfrutè instësc
L'invocaziun dla defensuria popolara ne sostituësc degun meso legal (recurs, lamentanza, obieziun) da se defëne cuntra na dezijiun aministrativa y ne sospënn gnanca la prozedöra o eventualmënter i termi.
Le dovëi di ofizi de dè inant informaziuns
Cun domandes sura l'andamënt dla prozedöra o la sitaziun legala, desses naôta jì dai ofizi competënć. Chisc é oblià de dè les informaziuns y po, sura les normes legales fora, ves informè sura l'andamënt dla pratica aministrativa y les poscibilitês de suzès de osta domanda. Sc'i ne sëis contënć cun les spligaziuns ćiafades o sc'i orëis deplü informaziuns da na pert independënta, sunse ion, tla cornisc de nostes competënzes, a osta desposiziun.
Degun anulamënt de dezijiuns aministratives
La defensuria popolara po constatè sce la prozedöra de n ofize é stada dërta y iüsta. Ara ne po indere nia anulè o mudé na dezijiun d'aministraziun. Ara po indere aconsié n ofize de eliminé na situaziun inconveniënta.
Consëis ala aministraziun
En gaujiun dl'ejaminaziun de na chestiun po la defensuria popolara ti dè racomanaziuns al organn aministratif plü alt autorisé da dè diretives, coche na situaziun inconveniënta po gnì eliminada o evitada tl dagnì. Ara n'é nia n'autorité legala. Mo la relaziun d'ativité che la defensuria popolara presentëia vigni ann tl Consëi provinzial y tla Junta provinziala, é n meso indiret efiziënt, che motivëia l'aministraziun de eliminé situaziuns inconveniëntes.
Degügn cosć
Le sorvisc dl defensur popolar provinzial é debann.
Ejams d'ofize
Le defensur popolar po ejaminé ofizialmënter situaziuns inconveniëntes ch'al sospetëia, de chëres ch'al é gnü informè tres i massmedia o da zitadins che n'é nia diretamënter atocà.