Ci ch’i fajun

La Defenüda zivica á la funziun dantadöt da ejaminé les lamentanzes, da dé informaziuns y da intermedié te conflic danter les zitadines y i zitadins y l'aministraziun publica.

Ejaminaziun dles lamentanzes

Ves sintise tratá/tratades iniustamënter da n ofize? Se tira osta prozedöra en lunch, ne rovëise nia pro üsc dërc? Ne sciafiëise nia da s'la fá avarëi, y n’él nia danman mesi legai? Nos ejaminun ostes lamentanzes y i se porvun da ciafé na soluziun y da verifiché sce le comportamënt dl ofize é sté dërt y iüst. I nes dun da fá por che les pratiches, les prozedöres y les dezijiuns dl'aministraziun publica vëgnes portades inant y fates do regola y por tëmp.

Consulënza y Informaziuns

Sc'i minëis da ne ciafé nia dötes les informaziuns debojëgn te chestiuns dl'aministraziun comunala y provinziala, sc'i adorëis deplü informaziuns o consëis tl raport cun i ofizi, sc'i ne savëis nia co o sce n provedimënt dl'autorité aministrativa é a post y é porchël da contesté, podunse ves dé les informaziuns y i consëis ch'i adorëis. Nos baiun de Osta chestiun cun Os y i ves aconsiunse co jí inant.

Mediadëssa danter zitadins y aministraziun

Sc'i ne se sintise nia tuc söl scerio da n'autorité, sc'i sëis dla minunga ch'i ëis le dërt a na dezijiun plü vantajosa, sc'i se stentëis da rajoné cun l'ombolt o cun val' impiegat, sc'i ëis problems sciöche dependënt dla Provinzia o dl Comun, cun osc datur de laur, pó la Defenüda zivica intermedié y chirí na soluziun tl conflit. La Defenüda zivica pó damané i ofizi do na tuta de posiziun a usc o por scrit. Nos podun ince intermedié y se dé da fá por ciafé na soluziun di conflic.

Ostes propostes vëgn menades inant

Sc'i cherdëis che i ofizi podess destrighé so laur te na manira plü razionala y plü asvelta y sc'i ëis propostes por mioré la situaziun, sc'i sëis dla convinziun che certes regoles dess gní mudades o eliminades y sce degügn ne ves ascuta sö, pó la defensuria popolara ti mené inant ostes propostes ai ofizi aministratifs o al Consëi provinzial.