Contignü prinzipal
La lege nöia regolamentëia le dovëi dl defensur popolar
Cun l’art. 5 dla lege provinziala di 10 de jügn dl 2008 gnôl integrè danü la lege sön le defensur popolar. Al gnô injuntè le punt „programaziun y esecuziun dl’ativité“. Aladô de chësta desposiziun mëss le defensur popolar ti presentè anter i 15 de setëmber dl ann al presidium dl Consëi Provinzial n program d’ativité cun laprò n preventif di cosć revardënt por l’ann che vëgn. Le presidium dl Consëi Provinzial mëss aprovè chësc program, impormò dedô vëgnel laurè ite tl bilanz de previjiun dla Provinzia y portè dant a döt le Consëi Provinzial por podëi gnì aprovè. Insciö ciafa le laûr dla defenüda zivica cotan de plü pëis. Ćina ćiamò messâ la defensuria popolara por vigni spëisa fà na domanda al Presidënt dl Consëi Provinzial, impormò dedô podôra se dè da fà ativamënter. Le regolamënt nü ê apontin n vare important tla direziun de na independënza finanziara dla defenüda zivica dal’aministraziun provinziala. „L’independënza, inće cun la liberté de istruziun y dötes les garanzies, é pö ma na mesa cossa, sce al n’alda nia inće la independënza economica laprò“, insciö Volgger.
Ai 4 de forà dl 2010 ê spo la lege dl 1996 definitivamënter sorpassada y ara gnô sostituida cun na lege nöia por le defensur popolar. Cun na unité surapartitica rera gnô la lege nöia surantuta tl Consëi Provinzial de Südtirol zënza usc decuntra y ma döes astenjiuns. Les novitês plü importantes reverda le prozedimënt da chirì fora y nominé le defensur popolar. La competënza dla defenüda zivica é inće gnüda ampliada. La istituziun é tl dagnì inće responsabla por i conzescionars di sorvisc publics dla Provinzia. Ara salta inće ite por garantì l’adoranza dl dërt sön l’azès a ać y documënć. Le tëmp dla inćiaria dl defensur popolar ne gnô nia plü lié ala perioda legislativa dl Consëi Provinzial, na desposiziun che é indere bele n ann dedô gnüda trata zoruch. La idea dla relaziun d’ativité anuala vëgn portada ite sciöche vincolënta y mëss tl dagnì gnì fata tl Consëi Provinzial. Inće la dezijiun sön le personal vëgn tratada te na manira plü flessibla. Le personal vëgn chirì fora dal Consëi Provinzial en acordanza cun la defensuria popolara y la defenüda zivica po ma tó sü colaboradus fora de chi ënć por chi che la defenüda zivica é competënta. Sce les aministraziuns tl ćiamp de competënza dla defenüda zivica ess da jì sura le tëmp por la elaboraziun de n caje fora o che ares ne partiss nia les racomanaziuns y les minunghes dla defensuria popolara, mësseres tl dagnì le motivé aposta.
Cun la manira de seleziun nöia é Burgi Volgger gnüda reconfermada te süa inćiaria ai 10 de novëmber dl 2010 cun dui terc dla maioranza.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
