Contignü prinzipal
Le mëteman
La lege sön la defenüda zivica dl 1983 tolô ite indöt 14 articui. Al gnô regolamentè la istituziun, l’ativité, la nominaziun, la dorada, i dovëis, le personal y la indenisaziun finanziara. Inlaôta gnôl deliberè de aćiasè la sënta dl defensur popolar tl’aministraziun provinziala. Mo les competënzes y i dovëis dl defensur popolar gnô formulà te na manira dër limitativa. Le defensur popolar dê ma agì sön interpelaziun de interessà y al dê ma podëi controlè ać aministratifs dl’aministraziun provinziala. Trames chëstes cosses s’à cun i agn dassënn mudé.
Mo ilò êl important da ciafè la dërta porsona por chësta inćiaria nöia. Le defensur popolar nü dê avëi conescënzes iuridiches y dê conësce i prozedimënć dl’aministraziun provinziala. Implü dêl avëi n pëis politich, insciö che la istituziun nöia ciafass atira reconescënza publicamënter. La dezijiun ê tla finada tomada sön Heinold Steger. Steger laurâ da feter 30 agn incà sciöche funzionar alt tl’aministraziun regionala, al ê stè diretur dla Lia di Paurs y assessur por l’agricoltöra. Do che al ê jü en ponsiun ê Steger gnü lité ai 15 de merz dl 1985 sciöche pröm defensur popolar. Bele ma cun so inom conesciü tla politica provinziala y ti cërtli dl’aministraziun trasmetôl respet por chësta inćiaria nöia. Al 1. d’aurì â Heinold Steger surantut süa inćiaria nöia. Steger â surantut la inćiaria cun na certa malfidënza, sciöche al scrî te süa relaziun finala por l’ann 1988. Mo al s’à laurè ite te süa inćiaria y „à ciafè sodesfaziun, ćiodiche le laûr y l’impëgn vëgn impò reconesciüs y i à la impresciun che an pois daidé dantadöt la tlassa de popolaziun plü debla.“ Le defensur popolar Steger ne se sintî nia sciöche ispetur che messâ vardè le laûr dl’aministraziun provinziala, sciöche al gnô datrai groforè canche an â metü man cun l’ativité. Steger se sintî plücater sciöche mediadù, che chirî compromisc danter zitadin y ofize, insciö che al ne messess nia gnì tut le tru ćer dla iurisdiziun.
Aladô de süa inćiaria mëss le defensur popolar ti presentè ala fin dl ann al Consëi Provinzial y al Govern Provinzial na relaziun anuala, che descrî le laûr fat da chësta istituziun. Dantadöt tl pröm adorân les relaziuns anuales ion da portè ite propostes de mioramënt. Insciö se stlujô jö la pröma relaziun anuala de Steger cun indicaziuns pratiches de sciöche an ess podü rënde ćiamò plü efiziënt le laûr dl defensur popolar. Aladô dla lege êl ma autorisé da intervegnì sön domanda de interessà y plü avisa te na manira definida, regolamentada tl art. 3 dla lege. Chësc articul dij: „Zitadins, che à na chestiun daverta cun n ofize provinzial o cun n ënt nominé tl art. 2 à le dërt de damanè do por scrit te chisc ofizi sciöche ara se sta cun la chestiun. Sce ai ne ciafa anter 20 dis dala domanda degöna resposta o che chësta ne basta nia, poi damanè l’aiüt dl defensur popolar.“ Por le defensur popolar Steger ê chësta manira de laurè trö’ massa restritiva. „Sce an messess tignì ite les regoles odüdes danfora, spo se smendriss le laûr tan dassënn, che an messess se damanè sce chësta istituziun va debojëgn“, scrî Steger te süa pröma relaziun anuala. Al dij d’ester por le fat che „vigni porsona che à n problem cun l’aministraziun provinziala dess podëi damanè le defensur popolar por scrit o a usc o ćinamai tres telefonn y che le defensur popolar instës pois damanè do te na manira informala les informaziuns che al po adorè.“ Chësta alisiraziun d’azès, scrî inant Steger, vëgn almanco te so ofize bele praticada informalmënter, inće sce ara ne corespogn nia dër ala lege. Agì ma sön interpelaziun ê por Steger propi massa püch. Val’ caje ê bëgn conesciü, mo al ne podô nia gnì tratè, sce degügn ne ti portâ dant le problem ala defenüda zivica. Sciöche ejëmpl porta Steger chilò i tëmps d’aspeta lunć tl ćiamp sanitar. Implü critichëia Steger la condiziun che la defenüda zivica ti vëgn assoziada al Govern Provinzial, mo che ara n’à degun influs sön le laûr dl Govern Provinzial.
Tl pröm messâ le ćiamp de competënza dla istituziun impormò cheriada ćiamò gnì definì dër avisa. Steger spligâ che so ofize gnô bele chirì por de vigni sort de chestiuns: „Y insciö minân che le defensur popolar podess sostituì l’avocat y dantadöt che al podess portè inant prozesc por chi che nen â debojëgn. D’atri minâ che al podess sostituì le vicar te litighes privates. D’atri indô portâ dant retlamaziuns cuntra infraziuns dla polizia.“ Mo Steger ne menâ demez degügn zënza avëi fat valch. „Ma na picia pert di caji gnô coiüda adöm tles statistiches. Tla maiù pert di caji se la cuntâl cun i atocà y i aconsiâ de se lascè rapresentè damì invalgó d’ater.“ Indöt à la defenüda zivica registré ti pröms ot mëisc de süa ativité 491 caji. Ma por dër püć di atocà gnôl inće respetè le tru ofizial, preodü tl art. 3 dla lege. La maiù pert di problems portà dant â bele le pröm ann de ativité da nen fà cun la urbanistica. Abité, contribuć por l’abité y por le frabiché alisiré ê y é por i zitadins de Südtirol de importanza zentrala. Steger pretenô por so laûr de podëi se lascè arjigné inće arać da porsones foradecà, insciö che al podess gnì stlüt jö i prozesc.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
