Contignü prinzipal
Le livel de popolarité dla defenüda zivica crësc inant
La relaziun anuala dl defensur popolar ê tomada fora dl 1997 y gnô recuperada da Palla impormò dl 1998. Al le motivâ cun la manćianza de personal. Tl medem tëmp se baudiâ le defensur popolar indere inće che „süa relaziun anuala ciafass massa püch interès dai politics y dai aministradus“. Dl 1998 à passa 2000 porsones chirì le contat cun i colaboradus dla defenüda zivica. Palla spliga chësc da öna na pert cun l’aumënt dl livel de popolarité de süa istituziun. Por mirit de süa ativité lezitënta sciöche reladù conesciô tres de plü jënt de Südtirol le defensur popolar y sü dovëis. „Dal’atra pert é le trend tres en aumënt pro i pröms contać cun la avocatöra inće da splighé cun l’ampliamënt dl ćiamp de intervenziun“, scrî Palla te süa relaziun anuala. Sciöche al é jü en forza l’articul 16 dla lege statala nr. 127/97 gnôl detlarè che la defenüda zivica por les regiuns y les provinzies autonomes ê inće competënta por les aministraziuns periferiches dl stat, cun ezeziun dla defenüda, dla segurëza publica y dla iustizia. Le defensur popolar ê bëgn tres intervegnü pro i ofizi statai, inće sce cun de manco pëis y forza. Cun la lege statala gnôl śëgn legitimé chësta situaziun.
Tla relaziun anuala dl 1998 ciafunse por le pröm iade n conzet che nes acompagnarà ćiamò por tröc agn: „mobbing“. Tres de plü porsones che laôra tl’aministraziun publica patësc sot a problems psicologics. Palla fajô porchël bele dl 1998 la proposta de mëte sö n „sorvisc psicologich por l’aziënda“.
Na spina te n edl ê por Palla dagnora chi impiegać y chës istituziuns, che refodâ de laurè adöm cun la defenüda zivica. Te n valgügn caji éssel porchël ion metü sön le program l’organn disciplinar y punì le personal competënt, sciöche al gnô odü danfora dala lege. Mo a chësc à Palla renunzié, ćiodiche al aratâ che al foss propi te chësc punt n tratamënt dër desvalì. Deperpo che al podess gnì portè inant na straufunga disciplinara por l’impiegat, ne jìssera nia da fà chësc por l’aconsiadù reponsabl te chësc ćiamp. Por le plü ademplî i impiegać ma les istruziuns dl politich, che ne podô nia gnì punì por so comportamënt nia cooperatif. Palla pretenô tres indô che al gniss fat cursc de formaziun obligatori por i impiegać dl’aministraziun. Le dër deport cun les porsones po gnì imparè, ê Palla dla convinziun. Tla finada podô tröc caji gnì spligà cun na manćianza de vijinanza ai zitadins. „L’impiegat n’à gonot nia la empatia, al ne se sënt porchël nia ite tla situaziun dl zitadin. Al ne vëgn nia ma damanè cordialité, mo an adora inće competënza profescionala, ćiodiche na resposta cordiala mo falada é baldi inće fatala. Sce la informaziun é cordiala y profescionalmënter coreta, po chësc inće ester massa püch, ćiodiche la resposta vëgn gonot dita fora te n lingaz burocratich nia da capì“, scrî Palla te süa relaziun anuala dl 1995. Le zitadin n’é nia n sotmetü dl stat, mo n partner dl’aministraziun publica. Ai 3 de merz dl 1999 ê Palla gnü confermè sciöche defensur popolar por la dorada de n’atra perioda legislativa.
Dl 2000 él indô rot fora n conflit davert danter le defensur popolar Palla y le presidënt dl Consëi Provinzial Hermann Thaler (SVP). De messè dl 2000 orô Thaler portè inant do so će n valgönes mudaziuns dla lege sön la defenüda zivica. Ara nen jô chilò dantadöt dla competënza dl defensur popolar ti comuns. Le presidënt dl Consëi Provinzial y nia sciöche ćina ćiamò le defensur popolar, dê stlüje jö la convenziun cun i comuns. Palla refodâ indere chësc punt, ćiodiche la lege gnô deliberada dal Consëi Provinzial cun chëstes parores „Le defensur popolar (...) po stlüje jö cun i comuns (...) na acordanza“. Implü orô Thaler che i comuns paiass n contribut por l’ativité dl defensur popolar. Le regolamënt varënt ćina ilò odô danfora che le Consëi Provinzial de Südtirol podô fissé n contribut. Palla se temô „che sce i comuns mëss paié por le laûr dl defensur popolar spo ne gnaràl nia plü tut en conscidraziun y chësc ne podess dessigü nia ester n bëgn por le zitadin dla Provinzia“. Do na discusciun plü lungia gnô les propostes de mudaziun tla finada trates zoruch da Thaler.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
