Contignü prinzipal
Al nasc la defenüda zivica
La storia dla defenüda zivica te Südtirol mët man ai 23 de forà dl 1983. Inlaôta êl gnü autorisé tl Consëi Provinzial de Südtirol sot al presidënt Giuseppe Sfondrini (PSI) y le vizepresidënt Matthias Ladurner-Parthanes (SVP) la proposta de lege nr. 291. Cun chësta lege dêl gnì metü sö te Südtirol la defenüda zivica. 18 aconsiadus â lité por la introduziun, deperpo che cin aconsiadus â dè jö na zetola blanćia. Te Südtirol êl nasciü la defenüda zivica. An sa bëgn che la idea de na defenüda zivica é cotan plü vedla. En general vëgnel odü la Svezia sciöche cöna dla defenüda zivica moderna. Tla Svezia gnôl bele dl 1809 metü sö le pröm ombudsman. Na porsona de crëta independënta, nominada dal parlamënt, che â le dovëi de controlè i impiegać dl re y de informè le parlamënt sön l’aministraziun. Do la Svezia êl stè i vijins finlandesc che â metü sö l’ombudsman sciöche organn de control dl’aministraziun. A livel mondial s’â la idea svedeja impormò slarié fora tla secunda pert dl XX secul. Propi ti agn Otanta y Nonanta gnôl cherié n gröm de istituziuns por l’ombudsman. Belanfat sce Parliamentary Commissioner, Médiateur, Bürgerbeauftragter, Volksanwalt, Difensore civico, Defensor del Pueblo, Provedor de justiçia o Commissioner for Human Rights: ara se trata chilò dagnora dl ombudsman. Tla Talia â la Toscana sciöche pröma regiun tut sö chësc pinsier. Dl 1975 êl gnü nominé le pröm „Difensore civico“. Dodesc d’atres regiuns y provinzies autonomes ti ê jüdes do. Dl 1983 êra inće te Südtirol tan inant. Ti agn denant ân tres indô porvè de cherié chësta istituziun. Bele dl 1973 ê le defensur popolar n argomënt por la campagna litala dl candidat Hans Rubner (SVP). Portè inant ativamënter la istituziun de na defenüda zivica cun propostes de lege aladô él stè i aconsiadus provinziai Willi Erschbaumer (SPS) y Luigi Costalbano (NL/NS) che à. Mo chisc n’â arjunt degöna maioranza. Inlaôta êson tl laûr de mëte sö la „seziun autonoma dl tribunal de iustizia aministrativa“ a Balsan. Tröc politics minâ che chësta istituziun bastass da podëi valuté damì les plüres di zitadins. Do che la introduziun dl tribunal de iustizia aministrativa s’â trat fora, â le Consëi Provinzial impò tut la dezijiun de se dè jö cun la istituziun dl defensur popolar. Mo ara n’ê nia jüda ma bele insciö da mëte sö la istituziun dla defenüda zivica. La pröma lege ê gnüda sciurada zoruch dal govern a Roma, ćiodiche le defensur popolar ciafâ competënzes che jô cotan sura chëres dla Provinzia fora. Y insciö âl messü gnì reformulé la proposta de lege tla pröma comisciun legislativa sot ala presidënza dl aconsiadù provinzial dla SVP Klaus Dubis. Impormò ilò â la lege ciafè l’aprovaziun dl govern, ê gnüda publicada tl Boletin ofizial dla Regiun y ê jüda en forza sciöche lege di 9 de jügn dl 1983, nr. 5.
| Titul | Download | |
|---|---|---|
|
L ie de bujën avëi nstalà l PDF Reader, acioche n posse giaurì y udëi i documënc tl format PDF che ie sun chësta plata. |
||
[Publicazions]
|
||
